Leikgleði / Mórall

 

Leikgleði er mikilvæg í knattspyrnu, bæði innan liðsins sem og á milli liða.Einnig þarf að bera virðingu fyrir dómaranum. Hann reynir ávallt að gera sitt besta. Mannleg samskipti eru öllum nauðsynleg og þú átt að koma fram við aðra eins og þú vilt að aðrir komi fram við þig. Ekkert lið getur orðið gott ef neikvæður hugsunarháttur einkennir liðið. Að vera gefandi og jákvæður merkir að maður gefur félaga heilsugar eitthvað af sjálfum sér, veitir honum athygli hvetur hann, gleðst með honum og styrkir hann þegar á móti blæs.

Að leika knattspyrnu er eftirvænting og spenna fyrir börn og unglinga. Knattspyrna er keppni milli einstaklinga og keppni tveggja liða. Hún krefst tæknilegra leikbrellna sem einstaklingar temja sér, búa yfir og skapa, auk leikfræðilegs breytileika sem er afrakstur liðsheildar, félagsþroska og samvinnu. Eitt að aðalmarkmiðum þjálfunar er að búa einstakling undir sjálstæða ákvörðunartöku og frjálsan leik þar sem gleði og ánægja situr í fyrirrúmi ásamt kennslu tækni og leikfræðilegra atriða.

Leikmaður veit best sjálfur hvað hann getur. Það er þjálfarans og aðstandenda að hvetja hann til dáða. Nauðsynlegt er að meta hæfni hans út frá þroska og kunnáttu og byggja hann þannig jákvætt upp. Tækni einstaklings er höfuðatriði í uppbyggingu ungra leikmanna. Tækniþjálfun og leikfræðilegur skilningur sem börn og unglingar temja sér varir ævilangt.

Maðurinn er félagsvera og ein af grunnþörfum hans er að vera þátttakandi í góðum hópi félaga. Grunnþarfir mannsins eru að gefa eitthvað frá sér og þiggja frá öðrum til að lifa og dafna. Allt þetta býður knattspyrnuleikur upp á. Sé vel að þjálfun staðið eflir knattspyrna einnig sjálftraust einstaklings. Þrátt fyrir að ákveðin ögun þurfi að vera fyrir hendi þá er jákvæð hvatning til allra leikmanna nauðsynleg jafnt og þétt meðan knattspyrnumaður er byggður upp.

Það er nauðsynlegt fyrir hvern einstakling að finna að eftir honum er tekið. Það eykur enn á sjálfsöryggi hans og vellíðan og er um leið ákveðinn grunnur að auknum framförum.

Í knattspyrnu á einstaklingur að læra að vinna í hóp og taka tillit til annara. Þannig má vænta góðs árangurs þegar til lengri tíma er litið.

bestu kveðjur

Freyr Sverrisson